تعالي نكمِّل المشوار
شاذلي جعفر شقاق
زي هوشة النحاس تلَّب مطفِّر قولي
يا والد المِحَنْ قَدَرك تربِّي تلولي
كان دايرْ تعبِّر طولك اِتْ بي طولي
الهولَك دون شك زِندية بصبح هولي
*. *. *
اركِزْ يا جُراب صَهَلنْ عليكَ وشبَّن
كنْدكَنْ السَّما وعَبَّنَّو موت وانْصبَّن
ومن تحْتَك لهيب نيران جهنَّم هبَّن
اولمتْ الصقور عُقْبنْ هَوام وضببَّن!
تعالي نكمِّل المشوار
بدون القَرْقَراب في الدَّار
بدون بيتنا الغزاه تتار
بدون المكتبة الحرقوها من غير تار
بدون حوشنا الوهيط ستَّار
بدون الغنوة والمسدار
بدون العش خدار وعَمَار
بدون اللمَّة عصْريَّات صغار وكبار
بدون ضلَّ الضحى التريان سلام وحوار
تعالي نكمِّل المشوار…
قبيييل جِبْناها من مافي
كريماً خيرو متْوافي
يشيل يدّي الكتير وافي
يصبِّر خُبزنا الحافي
ضراع النعمة والعافي
يقين وحلال من الكافي
ومو همباتي سيَّافي
إذا ما جاتنا ختَّافي
بكرة بتضحك الأيام
ويرٰجع نبعها الصافي
وتعود الموجة للقادوس
وكيف أصبحتو عوافي؟
وتعالي نكمل المشوار
تعالي ننضِّف الفِجَّة
فلول الحِجَّة واللِّجَّة
رعاع الجنجا واللَّجَّة
نصول فوق الصهل فجَّ
جرارِقْ والوَغَش ضجَّ
نسوراً خاتية من لَجَّة
صواقع تاكل اللُّجَّة
تختف الساق مع القُجَّة
وبي باقيهم ابْ سَعَّان وقف قَجَّ
قبيل قُنَّاها للراكزين ولي الهجَّ
عشان ما تروق تدور خجَّة
وتعالي نكمِّل المشوار
يناير ٢٠٢٤م
