د/محمد البيدر عثمان محمد
من بعد ماانفض المزار..
من بعد ما انفض المزار ..
دايرين نقول ليك الوطن
رمزيته أكبر من جدار
ياسارق الحلم الجميل..
وميتِّم أفراح النهار
العار ملازمك خم وشيل
أما احنا قولناهو القرار
ياثورة ناصعه دهب أصيل
يا سُكنه في دار القرار..
ومن بعد ما انفض المزار
ماانفض سامرنا القبيل
ضمانا نيل ودليب وطار..
الهودنه وسكج شليل،
يا شليلنا ماطال الودار..
ملوال مع عبد الفضيل،
سامر وكلتوم وانتصار.
جيلاً يبث الشوق لجيل…
لا شكوى من عنت المسير،
ولا يأس من طول إنتظار
قسماً ولا همانا ليل،
جزماً ولا شفنا انكسار..
من جِدّنا بعانخي القِبَيل
ورمز الكرامة المك نمر،
من دقنه والسلطان دِينار..
لامن تصل ضَي القَبيِلْ
عبدالعظيم والمات كما الشِدَر الكُبار
عبد السلام مليون سلام
نعمان محمد ود مطر
سيف اليزل واسماء كُتار..
* **
ومن بعد ما كان اللي كان
والدنيا عيد
والدم مطر والعين شرار..
الليله جايي تقول مزار..
حتماً حنبنيهو المزار
من صرخة الطفل المرق يا دابو ،
والدنيا احتضار..
حتماً حنبنيهو المزار
من شهقة النيل البلع
ولداً مكتّف بالحُجار..
حتماً حنبنيهو المزار
من جذوة المات في الترس
واقف أمام جيش التتار..
* * *
وآخر كلامنا ان كان
ولا بد من مقال
دايرين نقول
امسح رسومنا من الطمي بنرسم علي ضو النهار
